Бүгін Шиелі ауданында құрылысы жүріп жатқан тампонажды цемент зауытының ауласында орналасқан уақытша жатақханалардың бірінен өрт шықты. Аталған оқиғаға байланысты арнайы топ жасақталып, жұмыс істеуде. Бұл туралы аудан әкімінің орынбасары Тұрмат Жағыпбаров баспасөз конференциясында мәлімдеді.

Мәлім болғандай, Шиелі ауданындағы №9 өрт сөндіру бөлім бекетіне жаңадан салынып жатқан цемент зауытының жұмысшыларының уақытша жататын жатақханаларының бірінен өрт шыққаны туралы ақпарат келіп түскен. Оқиға орнына өрт сөндіру қызметкерлері барғанда жатақхана ғимаратының жанып жатқаны белгілі болды. Өрт толықтай сөндірілгеннен кейін ғимарат орынын тазалау барысында «Чайна Триумф Интернэшнл Инжиниринг» ЖШС-і филиалының қызметкері Қытай Халық Республикасы, Жансу елді-мекеннің азаматы 02.04.1976 жылғы Жоу Вейдің мәйіті табылды.